60 წლის კინოვარსკვლავი, ბრედ პიტი, შეყვარებულთან, 34 წლის ინეს დე რამონთან ერთად ვენეციის კინოფესტივალზე საჯაროდ გამოჩნდა. წყვიილი ფილმ Wolfs-ის პრემიერას დაესწრო. ანჯელინა ჯოლისთან ჯერ კიდევ მიმდინარე მტკივნეული განქორწინების ფონზე, პიტი და მისი შეყვარებული იტალიაში, კამერებისთვის ჯორჯ და ამალ კლუნებთან ერთად პოზირებდნენ.
ბრედი წითელ ხალიჩაზე თავის გლამურულ მეგობარ გოგოსთან პირველად გამოჩნდა. ინესი სამკაულების დიზაინერია და დაახლოებით ორი წელია, რაც წყვილი ერთადაა.
ვარსკვლავების ვენეციაში გამოჩენა ორმაგ პაემანს დაემსგავსა, რადგან ბრედის მეგობარი ჯორჯ კლუნი საღამოზე თავის მეუღლე ამალთან ერთად იმყოფებოდა, რომელმაც ყურადღება თავისი გრაციოზული ყვითელი კაბით მიიპყრო.
რაც შეეხება პიტის შეყვარებულს, ინესს ცალსახელოიანი თეთრი კაბა ეცვა, რომელსაც ნაოჭებიანი დეტალები ამკობდა. მას ასევე, ვერცხლისფერი ჩანთა და გრძელი საყურეები ამშვენებდა.
დე რამონი, რომელიც ასევე განქორწინებულია, მიმდინარე წლის თებერვალში ლოს-ანჯელესში, საცხოვრებლად ბრედთან გადავიდა. ანჯელინა ჯოლისთან დაშორების შემდეგ ეს ბრედის პირველი სერიოზული ურთიერთობაა.
ფილმში Wolfs ჯორჯი და ბრედი კრიმინალური შემთხვევების ადგილების “დასუფთავების” სპეციალისტებს თამაშობენ. სიუჟეტის მიხედვით, უცნაური დამთხვევა მოხდება და ისინი ერთ სამუშაოზე აღმოჩნდებიან – სასტუმროს ოთახიდან ცხედრის გატანა დაევალებათ.
არსებული ინფორმაციით, მთავარ როლში მყოფმა ორივე მსახიობმა პროექტში 35 მლნ დოლარი გამოიმუშავეს. მათი მოთხოვნა იყო, რომ სურათი კინოთეატრებში ეჩვენებინათ, თუმცა Apple-მა გადაიფიქრა და ფილმი, რომელიც ინსაიდერების ცნობით, საერთო ჯამში 200 მლნ დოლარი დაჯდა, აშშ-ის კინოთეატრებში მხოლოდ ერთი კვირის განმავლობაში გავა.
სხვა ტერიტორიებზე კინოსურათის ნახვა ინტერნეტში ე.წ. streaming-ის საშუალებით იქნება შესაძლებელი, რაც მას ყველაზე ძვირადღირებულ სატელევიზიო ფილმად აქცევს.
Apple-მა ეს გადაწყვეტილება იმის ფონზე მიიღო, რომ მის მიერ გამოშვებულმა სხვა ფილმებმა, მაგალითად “ნაპოლეონმა”, კინოთეატრებში კრახი განიცადეს.
