გავრცელებული ინფორმაციით, საქართველოს მოქალაქე 43 წლის მაკა ქათიბაშვილი 12-წლიანი ძებნის შემდეგ თურქეთში დააკავეს და გასულ კვირას იტალიის პოლიციას გადასცეს. ქალი 2012 წლიდან ინტერპოლის წითელი ცირკულარით იძებნებოდა და შეყვანილი იყო 100 ყველაზე საშიშ გაქცეულთა სიაში.
მაკა ქათიბაშვილს იტალიის სამართალდამცავი უწყება 2012 წელს, ქალაქ ბარში ე.წ. კრიმინალური ავტორიტეტის რევაზ ჭურაძის მკვლელობაში მონაწილეობისთვის ეძებდა. ქალს დაუსწრებლად 21 წლით თავისუფლების აღკვეთა აქვს მისჯილი.
მედიის ინფორმაციით, ქათიბაშვილი შეცვლილი სახელითა და გვარით 2017 წლის შემდეგ თურქეთში ცხოვრობდა. თურქული მედია ქალის დაკავებას იტალიისა და თურქეთის პოლიციის ძალების კოორდინირებული მუშაობის შედეგად მიღწეულ მნიშვნელოვან გამარჯვებად მიიჩნევს.
იტალიის პოლიციის მიერ გავრცელებულ განცხადებაში ნათქვამია, რომ 43 წლის ქათიბაშვილი, სავარაუდოდ, დაკავშირებულია მაფიოზურ კრიმინალურ ორგანიზაციასთან, კერძოდ, “კანონიერი ქურდების” ერთ-ერთ კლანთან.
იტალიური მართლმსაჯულებისგან თავის დასაღწევად, ქალმა საქართველოში გაქცევის შემდეგ, 2017 წელს ფიქციურად იქორწინა საქართველოს მოქალაქესთან, რის შემდეგაც გვარის შეცვლა და ახალი პასპორტის აიღო. შემდეგ ყალბი პირადობის მოწმობით საცხოვრებლად თურქეთში გადავიდა, საიდანაც ფული საქართველოში გაგზავნა.
- ვინ იყო რეზო ჭურაძე?
იტალიაში მოკლული 51 წლის რეზო ჭურაძე 2012 წლის 9 იანვარს, ქალაქ ბარის მთავარ მოედანზე მოკლეს. კაცი ამანათების საწყობში მუშაობდა და თავს სამსახურთან დაესხნენ. გასროლა ახლო მანძილიდან 7-კალიბრიანი იარაღიდან მოხდაა. რევაზ ჭურაძე მიყენებული ჭრილობებით ადგილზე გარდაიცვალა.
იტალიელი სამართალდამცავების ვარაუდით, ჭურაძის მკვლელობა მის უკანონო ბიზნესს უკავშირდებოდა, რადგან სამართალდამცავებმა ამანათების საცავში დარღვევები აღმოაჩინეს. რევაზ ჭურაძეს კანონდარღვევის გამო პოლიცია რამდენიმე თვის განმავლობაში აკვირდებოდა.
გარდაცვლილის საცხოვრებელი ბინის ჩხრეკისას პოლიციამ საქართველოს სხვა მოქალაქეების პასპორტები და ფოტოებიც აღმოაჩინა.
იმჟამად ქართული მედია წერდა, რომ სამართალდამცავების ყურადღება ერთმა ფოტომ მიიპყრო, რომელზეც ჭურაძის მეგობარი ხელს იმჟამად რუსეთის პრემიერ-მინისტრ ვლადიმერ პუტინს ართმევს.
პოლიციის ვერსიით, ბარში, ქართველებს ჩამოყალიბებული ჰქონდათ კავშირი, რომელიც ხალხს ათასობით დოლარის გადახდას აიძულებდნენ. თანხა მათ უმბერტოს სახელობის სკვერში არსებულ ოფისში უნდა მიეტანათ.
როგორც იტალიური მედია იუწყება, ამ კავშირს ჭურაძე წლების განმავლობაში ხელმძღვანელობდა და სავარაუდოდ, მკვლელობაც ამ კავშირზე განაწყენებული მოქალაქეების ჩადენილია.
რევაზ ჭურაძე ე.წ. კანონიერი ქურდის, თემურ ჭურაძის, მეტსახელად, “შოშიას’ მამა გახლდათ.
